ජ.වි.පෙ - මෛත්‍රි රහස්‌ ගිවිසුම් හෙළි කිරීමට
ගුණරත්නම් එනවා- පෙරටුගාමී ප්‍රචාරක ලේකම් කියයි
ජනතා විමුක්‌ති පෙරමුණ සහ විපක්‍ෂයේ පොදු අපේක්‍ෂක මෛත්‍රීපාල සිරිසේන මහතා අතර ඇති රහස්‌ ගිවිසුම් හෙළිකිරීම සඳහා පෙරටුගාමී සමාජවාදී පක්‍ෂයේ නායක කුමාර් ගුණරත්නම් මහතා (කුමාර් මහත්තයා) අද (01දා) හෝ හෙට ශ්‍රී ලංකාවට පැමිණීමට නියමිත බව එම පක්‍ෂයේ ප්‍රචාරක කම් පුබුදු ජයගොඩ මහතා ප්‍රකාශ කළේය.
පොදු වාමාංශික අපේක්‍ෂකයා ලෙස ජනාධිපතිවරණයට ඉදිරිපත්ව සිටින පෙරටුගාමී පක්‍ෂයේ දුමින්ද නාගමුව මහතා විසින් මෙම 05 වැනිදා කඩවත නගරයේ පවත්වන අවසන් ප්‍රචාරක රැලිය අමතමින් කුමාර් ගුණරත්නම් මහතා ජනතා විමුක්‌ති පෙරමුණ පිළිබඳ බොහෝ දැ හෙළිකරනු ඇතැයි ජයගොඩ මහතා "දිවයින"ට කීවේය.
ආණ්‌ඩුවේ අවසරය මත ශ්‍රී ලංකාවට පැමිණීම සඳහා කුමාර් ගුණරත්නම් මහතාට ආගමන විගමන දෙපාර්තමේන්තුව විසින් වීසා නිකුත් කර ඇත. කුමාර් ගුණරත්නම් මහතාගේ බිරිය වන චම්පා සෝමරත්න මහත්මිය සහ පුතණුවන්ද පසුගිය 26 වැනිදා එස්‌කිව් 468 දරන සිංගප්පූරු ගුවන් සේවයට අයත් ගුවන් යානයකින් ශ්‍රී ලංකාවට පැමිණි අතර ඔවුහු දැනට පිළියන්දල ප්‍රදේශයේ පදිංචි වී සිටිති.
http://www.divaina.com/2015/01/01/news14.html
ජනතා විමුක්‌ති පෙරමුණේ ඉදිරිපෙළ ක්‍රියාකාරී නායකයකුව සිටි කුමාර් ගුණරත්නම් මහතා තවත් සාමාජිකයන් පිරිසක්‌ සමඟ එම පෙරමුණෙන් ඉවත්ව ගොස්‌ පෙරටුගාමී සමාජවාදී පක්‍ෂය පිහිටුවා ගත්තේය. ඒ වන විට ඒ මහතා ඔස්‌ටේ්‍රලියාවේ ජීවත්වූ අතර වෙනත් නමකින් ශ්‍රී ලංකාවට පැමිණ සිටියදී වසර දෙකකට පෙරදී අත්අඩංගුවට ගැනිණි. පසුව මෙරට ඔස්‌ටේ්‍රලියානු මහකොමසාරිස්‌ කාර්යාලයේ මැදිහත්වීම මත ගුණරත්නම් මහතා අත්අඩංගුවෙන් මුදාහැර ශ්‍රී ලංකාවෙන් පිටුවහල් කරන ලදී.
එසේ පිටුවහල් කරද්දී ඒ මහතා වෙනුවෙන් පනවන ලද රුපියල් 29,130 ක දඩ මුදල පසුගියදා 24 දා එම පක්‍ෂයේ පාර්ලිමේන්තු මන්ත්‍රී අජිත් කුමාර මහතා විසින් ආගමන විගමන දෙපාර්තමේන්තුවට ගෙවා ඇත.
කුමාර් ගුණරත්නම් මහතා ඔස්‌ටේ්‍රලියානු පුරවැසිභාවය ලබාගත් අයකු වන අතර ශ්‍රී ලංකාවේදී උපත ලබා ඇත.
ගුණරත්නම් මහතාට ශ්‍රී ලංකාවට පැමිණීම සඳහා වන ගුවන් ගමන් ප්‍රවේශ පත්‍රය ඊයේ වෙන්කර ගැනීමට නියමිතව තිබූ බවද පුබුදු ජයගොඩ මහතා වැඩිදුරටත් පැවැසුවේය.
No comments:
Post a Comment